ஹேமா அறிக்கை வெளியாக மலையாள திரையுலகை பதற செய்து வரும் நிலையில், சீனியர், ஜூனியர் நடிகர்கள் சிலர் தங்களிடம் தவறாக நடந்து கொள்வதாக கடுமையான குற்றச்சாட்டுகளை ஒருவர் பின் ஒருவராக ஜூனியர் ஆர்டிஸ்ட்கள் எழுப்பி வருகின்றனர்.
நடிகரும், மலையால திரையுலகின் அம்மா சங்கத்தின் முன்னாள் பொதுச் செயலாளருமான எடவேல பாபு மீது சில கலைஞர்கள் கடுமையான குற்றச்சாட்டுகளை எழுப்பினர்.
ஜூனியர் ஆர்ட்டிஸ்ட் ஜூபிதா ஊடகங்களுக்கு அளித்த பேட்டியில், அம்மா உறுப்பினர் கட்டணத்திற்கு பதிலாக எடவேல பாபு தன்னை மாற்றிக் கொள்ளுமாறு கேட்டுக் கொண்டார். நடிகை உஷா ஒரு இயக்குனருடன் தனக்கு ஏற்பட்ட விரும்பத்தகாத அனுபவத்தையும், தனது அறைக்கு அவர் அழைத்தார் என்றும் பேசியிருக்கிறார்.
‘உறுப்பினர் கட்டணமான ரூ.2 லட்சம் பணத்தைக் கட்டுவதற்கு பதிலாக அட்ஜஸ்ட் செய்து கொண்டால், அந்தத் தொகையை கொடுக்க வேண்டிய அவசியமில்லை, மேலும் பட வாய்ப்புகளும் கிடைக்கும் என்றார்.
இதனை சரி செய்து கொண்டால், திரையுலகிலும் உச்சத்தை அடையலாம் என்றார். ஹரிகுமார் மற்றும் சுதீஷிடம் இருந்து மோசமான அனுபவம் ஏற்பட்டது. ஹரிகுமார் படத்தை முடித்துவிட்டு மறுநாள் வரச் சொன்னார்.
ஆனால், நான் செல்ல மறுத்து விட்டேன். சுதீஷ் என்னை தன்னுடன் ஒரு நீண்ட பயணத்திற்கு உடன் வரச் சொல்லி கட்டாயப்படுத்தினார். நாம் எந்த இடத்திற்குச் சென்றாலும், அட்ஜெஸ்ட்மெண்ட செய்து வரும் வாய்ப்புகள் வேண்டாம்” என்று விலகி விட்டேன் என்றார்.
ஜூனியர் ஆர்ட்டிஸ்ட் அஸ்னியா கூறுகையில், சினிமா துறையில் தாங்கள் மிகவும் சுரண்டப்படும் பிரிவினர். எந்த ஒப்பந்தமும் இல்லாமல் சினிமாவில் நுழைகிறார்கள். எனவே, சரியான ஊதியம் கிடைக்கவில்லை.
ரூ. 5000 கொடுக்க வேண்டும் என்பது சங்க விதி. ஆனால் ரூ. 1500 மட்டுமே கிடைத்தது. 30 நாட்கள் வேலை செய்த பிறகு இவ்வளவு கிடைத்தது. இது குறித்து கேள்வி எழுப்பிய பின்னர், அதன் பிறகு நான் எந்த படத்திற்கும் அழைக்கப்படவே இல்லை என்றார்.
இளைய கலைஞர்கள் இருப்பிடத்தில் அடிமைத்தனத்தை எதிர்கொள்கின்றனர். உடை மாற்றக் கூட பாதுகாப்பான இடம் இல்லை. ஒரு புரொடக்ஷன் கன்ட்ரோலர் என்னிடம் நேரடியாகச் சொன்னார், அவருடன் அட்ஜஸ்ட் செய்தால் தனக்கு வாய்ப்பு கிடைக்கும் என்று. தன்னுடன் ஒத்துழைத்த சில நடிகைகளின் படங்களை காட்டினார் என்று புகார் கூறியுள்ளார் அஸ்னியா.
ஹேமா கமிட்டி அறிக்கை வெளியான பிறகு முன்னணி நடிகைகள் படங்களில் தங்களுக்கு ஏற்பட்ட மோசமான அனுபவங்களை வெளிப்படையாகப் பேச பலரும் முன் வந்துள்ளனர்.
ரஞ்சித் இயக்கிய ‘பலேரி மாணிக்யம்’ படத்தில் நடிக்க வந்தபோது இயக்குனர் ஒருவர் தவறாக நடந்து கொண்டதாக பெங்காலி நடிகை ஸ்ரீலேகா மித்ரா நேற்று முன்தினம் தெரிவித்தார். ‘அம்மா’ செயற்குழு உறுப்பினரும் நடிகையுமான அன்சிபா ஹாசனும் தனக்கு ஏற்பட்ட மோசமான அனுபவத்தை விவரித்தார்.